...

SPECIALIZED SITE FOR HUMAN HEALTH CARE,
SPECIALLY ON GASTROENTEROLOGY, LIVER AND PANCREAS

ప్రత్యేక ప్రతిపత్తి (స్పెషల్‌ స్టేటస్‌) ఎందుకు..

ప్రత్యేక ప్రతిపత్తి కల్పించాలంటే కచ్చితంగా ఆ ప్రత్యేకత ఏమిటో తెలుసుకోవాలి. అప్పుడే దాని మీద అభిప్రాయం వెలిబుచ్చటానికి వీలవుతుంది.

శరీరంలో పాన్‌ క్రియాస్‌ (తెలుగులో క్లోమం అంటారు) గ్రంథికి ఈ విధమైన ప్రాధాన్యం ఉంది. శరీరంలో కొన్ని గ్రంథులు జీర్ణ క్రియకు అవసరమైన ఎంజైమ్‌ లను స్రవిస్తాయి. వీటిని నాళ గ్రంథులు అంటారు. అంటే ఈ గ్రంథికి ఉండే నాళం ద్వారా ఆయా ఎంజైమ్‌ లు విడుదల అవుతాయి. జీర్ణ క్రియ లో పాల్గొంటాయి. మరికొన్ని గ్రంథులు కేవలం హార్మోన్‌ లను స్రవిస్తాయి. ఇవి వినాళ గ్రంథులు. అంటే ఎటువంటి నాళాన్ని కలిగి ఉండవు. వీటి నుంచి ఉత్పత్తి అయ్యే హార్మోన్‌ లు నేరుగా రక్తంలో కలిసిపోయి ఆయా భాగాలకు చేరుకొంటాయి. అయితే పాన్‌ క్రియాస్‌ మాత్రం అటు నాళ గ్రంథిగా, ఇటు వినాళ గ్రంథిగా పనిచేస్తుంది. జీర్ణాశ‌యంలో ఎగువ భాగంలో దీన్ని గ‌మ‌నించ‌వ‌చ్చు. పాన్ క్రియాస్ లో ముఖ్యంగా రెండు విభాగాలు ఉంటాయి. మొద‌టి విభాగం ఎంజైమ్ ల‌ను ఉత్పత్తి చేసి చిన్న పేగు లో ఆహారాన్నిజీర్ణం చేయ‌టానికి ప‌ని చేస్తుంది. దీన్ని ఎక్సో క్రైన్ ప్యాన్ క్రియాస్ అంటారు. ఇందులో ముఖ్యమైన ఎంజైమ్ లు అమైలేజ్‌- పిండి ప‌దార్థాల్ని, లైపేజ్‌-కొవ్వు ప‌దార్థాల్ని, ట్రిప్సిన్‌- మాంస‌కృత్తుల్ని జీర్ణం చేస్తాయి. ఒక మాట‌లో చెప్పాలంటే ఆహారంలోని అన్ని ప్రధాన ప‌దార్థాల్ని పాన్ క్రియాటిక్ జ్యూసెస్ జీర్ణం చేస్తాయి. ఇది కాకుండా పాన్ క్రియాస్ లోని రెండో విభాగాన్ని ఎండో క్రైన్ పాన్ క్రియాస్ అంటారు. ఈ విభాగం అనేక ర‌కాల హార్మోన్ ల‌ను ఉత్పత్తి చేయ‌టం ద్వారా శ‌రీరంలోని గ్లూకోజ్ స్థాయిని నియంత్రిస్తుంది. ఈ విభాగంలోని ఇబ్బందులే డ‌యాబెటిస్ (మ‌ధుమేహం)కు దారి తీయ‌వ‌చ్చు. 

అందుచేత పాన్‌ క్రియాస్‌ కు ప్రత్యేక ప్రతిపత్తి ఉంటుందని అర్థం చేసుకోవాలి. ఈ విధమైన ప్రత్యేకత ఏ ఇతర భాగానికి లేదని గుర్తెరగాలి.

గుంటూరు-కృష్ణా జిల్లాల్లో ఇప్పుడు గమనిస్తున్న అంశం ఏమిటంటే..?

గుంటూరు-కృష్ణా జిల్లాలు కోస్తాంధ్ర లో మధ్య లో ఉన్న రెండు జిల్లాలు. ఈ రెండు జిల్లాల్లో తూర్పున విస్తరించి బంగాళాఖాతం. అంతే కాదు.. కోస్తా లోని తొమ్మిది జిల్లాల్లోనూ కూడా బంగాళాఖాతం కనిపిస్తుంది.
 ఈ సముద్ర తీర ప్రాంతాల్లో ఉప్పు గాలి వీస్తు ఉంటుంది. ఇది ఒక రకంగా ఉండే ప్రత్యేక మైన గాలి అనుకోవచ్చు. కొబ్బరి, సర్వేరు వంటి కొన్ని రకాల చెట్లు ఈ గాలిలోనే ఎక్కువ పెరుగుతాయి. ఈ విషయాన్ని పక్కన పెడితే ఈ తీర ప్రాంతాల్లో ఉండే చిన్నారుల్లో ట్రాపికల్ పాన్‌ క్రియాటైటిస్‌ అనే వ్యాధిని ఎక్కువగా గమనించటం జరుగుతోంది. పాన్‌ క్రియాస్‌ అనే గ్రంథిలో ఏర్పడే ఈ సమస్య – చాలా వరకు అక్కడ ఉండే  చిన్న పిల్లల్లో గమనించటం జరుగుతోంది. వాస్తవానికి పాన్‌ క్రియాస్‌ అనేది శరీరంలోనే ఒక విశిష్టమైన గ్రంథి. ఇది ఎంజైమ్‌ లను స్రవించటం ద్వారా జీర్ణ క్రియలో కీలక పాత్ర వహిస్తుంది. చాలా వరకు ఆహార పదార్థాలు జీర్ణ మయ్యే పేగుల్లో ఈ ఎంజైమ్‌ లు చురుకైన పాత్ర పోషిస్తాయి. అటు, గ్లూకగాన్‌, ఇన్సులిన్‌ వంటి హార్మోన్‌ లను స్రవించటం ద్వారా గ్లూకోజ్‌ ను క్రమబద్దం చేయటంలో కూడా పాన్‌ క్రియాస్‌ ముఖ్య భూమిక పోషిస్తుంది. ఒక్క మాటలో చెప్పాలంటే ఎంజైమ్‌లను, హార్మోన్లను రెంటినీ స్రవించే ఏకైక గ్రంథిగా దీన్ని చెప్పవచ్చు.


కడుపులో తీవ్రమైన నొప్పి తో పాటు బరువు తగ్గటం, పోషకాహార లోపం వంటి లక్షణాల్ని గమనించవచ్చు. కచ్చితంగా ఈ సమస్య తలెత్తటానికి కారణం తెలీక పోయినా పుట్టుకతో వచ్చే జన్యు లోపాల్ని గుర్తుంచుకోవాల్సి ఉంటుంది.. ఈ సమస్యకు చికిత్స చేయించకపోతే మదుమేహం తలెత్తే అవకాశం ఉందన్న మాట ఉంది. ఒక్కోసారి ఇది పాన్‌ క్రియాటిక్‌ క్యాన్సర్‌ కు దారి తీసే ప్రమాదం ఉంది. సీటీ స్కాన్‌, ఎండోస్కోపీ వంటి పరీక్షలతో దీన్ని నిర్ధారిస్తారు. మందులతో సమస్య పరిష్కారం దొరక్కపోతే ఆపరేషన్‌ చేయాల్సి ఉంటుంది. కోస్తా ప్రాంతంలోని చిన్నారులు కడుపు నొప్పి తో బాధ పడుతుంటే- ఈ విషయాన్ని కాస్త గుర్తించుకోవాల్సిన అవసరం ఉంది.

ఈ రోజు ప్రాధాన్యం తెలుసు క‌దా.. !

ఈ రోజుకి చ‌రిత్ర‌లో ప్రాధాన్యం ఉంది. అంద‌రూ దీని గురించి ఆలోచించాల్సిన అవ‌స‌రం ఎంతైనా ఉంది. జూన్‌నెల‌లో మొద‌టి ఆదివారం రోజున క్యాన్స‌ర్ నుంచి విముక్తి పొందిన వారితో క‌లిసి క్యాన్స‌ర్ స‌ర్వైవ‌ర్స్ డే ను పాటిస్తుంటారు.

 క్యాన్స‌ర్ అంటే అదేదో అంతు ప‌ట్ట‌ని వ్యాధి అని అంతా భావిస్తుంటారు. చికిత్స లేని మొండి రోగం అని, క్యాన్స‌ర్ వ‌స్తే ఇక చేసేదేమీ లేద‌ని అపోహ‌లు ఉన్నాయి. ఇది ఏమాత్రం వాస్త‌వం కాదు.
క్యాన్స‌ర్ వ్యాధికి చికిత్స ఉంది. ముఖ్యంగా జీర్ణ వ్య‌వ‌స్థ‌లోని ఆహార వాహిక‌, జీర్ణాశ‌యం, చిన్న పేగు, పెద్ద‌పేగు తో పాటు అనుబంధ గ్రంథులైన కాలేయం, క్లోమం ల‌లో క్యాన్స‌ర్ త‌లెత్తుతుంటుంది. క్యాన్స‌ర్ అంటే అవాంఛిత క‌ణ‌జాలం ఒక చోట చేరి, విస్త‌రిస్తుండ‌టం అని చెప్ప‌వ‌చ్చు. ఈ రోగ‌కార‌క క‌ణజాలం విస్త‌రించి ఆరోగ్య‌క‌ర‌మైన క‌ణ‌జాలాన్ని ఆక్ర‌మిస్తుంటుంది. దీంతో ఇత‌ర వ్య‌వ‌స్థ‌లు కూడా విఫ‌లం అవుతుంటాయి.
జీర్ణ వ్య‌వ‌స్థ‌లోని భాగాల్లో ఏర్ప‌డే క్యాన్స‌ర్ కొన్ని సార్లు ఇత‌ర ప్రాంతాల‌కు కూడా వ్యాపించ‌వ‌చ్చు.

వాస్త‌వానికి క్యాన్స‌ర్ కు ఆధునిక వైద్య శాస్త్రంలో చ‌క్క‌టి చికిత్స‌లు ఉన్నాయని గుర్తించుకోవాలి. ఎంత త్వ‌ర‌గా గుర్తిస్తే క్యాన్స‌ర్ ను న‌యం చేయ‌టం అంత తేలిక అవుతుంది. మొద‌టి ద‌శ‌లో ఆప‌రేష‌న్ చేయ‌టం ద్వారా క్యాన్స‌ర్ ను పూర్తిగా తొల‌గించ‌వచ్చు. త‌ర్వాత ద‌శ‌ల్లో ఆప‌రేష‌న్ తో పాటు కీమో థెర‌పీ, రేడియో థెర‌పీ వంటి చికిత్స‌లు అవ‌స‌రం అవుతాయి. వ్యాధి పూర్తిగా ముదిరిపోయిన‌ప్పుడు కూడా ఆధునిక చికిత్స‌ల‌తో నాణ్య‌మైన శేష జీవితాన్ని అందించేందుకు వీల‌వుతుంది.
క్యాన్స‌ర్ వచ్చింద‌ని తెలియ‌గానే కంగారు ప‌డాల్సిన అవ‌స‌రం లేదు. నిపుణులైన వైద్యుల్ని సంప్ర‌దించి చికిత్స చేయించుకోవాలి. క్యాన్స‌ర్ కు ఆధునిక చికిత్స‌లు అందుబాటులో ఉన్నాయ‌ని తెలుసుకోవాలి. క్యాన్స‌ర్ విష‌యంలో అంద‌రికీ అవగాహ‌న అవ‌స‌రం. ఈ ర‌క‌మైన అవ‌గాహ‌న క‌ల్పించేందుకు ఇటువంటి క్యాన్సర్ స‌ర్వైవ‌ర్స్ డే లు ఉప‌యోగ‌ప‌డ‌తాయి.