వేడి వేడి టీ తాగటం, వేడి వేడి ఆహారం తినటంతో సమస్యలు ఉన్నాయా..

అతి వేడి ఆహారం తిన‌టం, అతి వేడి టీ తాగ‌టం, వేయించిన మాంసాహారం తీసుకోవ‌టం వంటివి త‌గ్గించుకొని దుర‌ల‌వాట్లకు దూరంగా ఉంటూ స‌మ‌తుల్య ఆహారం తీసుకొంటే జీర్ణ వ్య‌వ‌స్థ ఆరోగ్యానికి మంచిది. లేదంటే ఇటువంటి అల‌వాట్లతో క‌డుపు లో విష‌ప‌దార్థాలు చేరి క‌డుపు క్యాన్సర్ వంటి రోగాల‌కు దారి తీస్తాయి. 

అంత మాత్రాన వేడిఆహారం తిన్న వారందరికీ క్యాన్సర్ వచ్చేస్తుందన్న మాట సరైంది కాదు. క్యాన్సర్ వచ్చే కారణాలలో ఇది కూడా ఒకటి అని మాత్రమే చెప్పవచ్చు.

   స‌రైన జీవ‌న శైలి లేక‌పోవ‌టం, దుర‌ల‌వాట్లు, జ‌న్యుప‌ర‌మైన మార్పులు, వంశ‌పారంప‌ర్యంగా వ‌చ్చే జ‌న్యు లోపాలు వంటి కార‌ణాల‌తో క‌డుపు క్యాన్సర్ ప్రబ‌లుతోంది. నిర్దిష్టమైన కార‌ణాన్ని చెప్పటం వీలు కాదు..ఆహారం మింగ‌టంలో ఇబ్బంది, ఏమీ తిన‌కుండానే క‌డుపు నిండుగా ఉండ‌టం, కొద్ది పాటి ఆహారం తిన్నా నొప్పి ,అజీర్తి, మ‌లంలో ర‌క్తం వంటి స‌మ‌స్యల‌తో దీన్ని అనుమానించాల్సి ఉంటుంది. అనుమానం ఏర్పడిన‌ప్పుడు ఎక్సురే, ర‌క్త ప‌రీక్షల‌తో పాటు ఎండోస్కోపీ, కొల‌నోస్కోపీ, సీటీ స్కాన్‌; ఎమ్ ఆర్ ఐ స్కాన్  వంటి ప‌రీక్షలు చేయించాల్సి ఉంటుంది. వ్యాధి తొలిద‌శ‌లో ఎండో స్కోపీ, కొల‌నోస్కోపీ విధానాల‌తో చికిత్స చేయ‌వ‌చ్చు. త‌ర్వాత ద‌శ‌లో ర్యాడిక‌ల్ ఆప‌రేష‌న్ చేయ‌టం ద్వారా మెరుగైన ఫ‌లితాలు పొంద‌వ‌చ్చు. వ్యాధి ముదిరినప్పుడు ఆప‌రేష‌న్ తో పాటు కీమో థెర‌పీ, రేడియో థెర‌పీ వంటి విధానాల‌తో నాణ్యమైన శేష జీవితాన్ని అందించ‌వ‌చ్చు.

    ఒక‌ప్పుడు క్యాన్సర్ వ‌చ్చిందంటే మ‌ర‌ణం త‌ప్పద‌న్న భావ‌న ఉండేది.  ఆధునిక వైద్య శాస్త్ర ప‌రిశోధ‌న‌ల‌తో చికిత్స మార్గాలు అందుబాటులోకి వ‌స్తున్నాయి. ప్రతిష్టాత్మక వైద్య సంస్థల్లో ప‌రిశోధ‌న‌లు జ‌రిపిన వైద్యులు ఈ చికిత్స మార్గాల్ని అంది పుచ్చుకొని చికిత్సలు అందించ‌గ‌లుగుతున్నారు.